شعری انتخاب افضل خان ۔۔۔۔۔محمد علی نیاز

ہر دل عزیز محبوب شاعر افضل خان صاحب کی کتاب "وہیں ملوں گا تجھے" میں سے پسندیدہ اشعار

 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کچھ بھی نہ سہی، ضبط کی تضحیک تو ہے نا 

پوچھے جو کوئ ہم سے کہ سب ٹھیک تو ہے نا 

چھونے کی تمنا تھی مگر باز رہا میں

دی دل کو تسلی کہ وہ نزدیک تو ہے نا

تجھ سہمے ہوئے چاند کو چھوڑ آوں میں گھر تک؟

کچھ اور نہ ہو راستہ تاریک تو ہے نا

اے زیست ! وضاحت نہیں دے داد کہ میں نے

نکتہ جو اٹھایا ہے وہ باریک تو ہے نا

کیسے میں کروں صبر کہ تیرا یہ دلاسہ

خوددار طبیعت کے لیے بھیک تو ہے نا

اندھی ہو تو کامل ہے محبت نہ عقیدت

حد درجہ یقیں باعثِ تشکیک تو ہے نا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

سفر کا حُسن ہے گرمی کی شدت میں اضافہ بھی

مجھے تاجٍ سلیماں لگ رہا ہے سر پہ صافہ بھی

اداسی کا نہ ہونا اور ہونا ایک جیسا ہے

ہم اٍس سے غائبانہ بھی ملے ہیں بالمشافہ بھی

لڑکپن میں کسی سازش کو خاطر میں نہ لاتے تھے

کھلا پاتے تھے ہم اکثر ترے خط کا لفافہ بھی

حقارت کی نظر سے دیکھتا تھا آئنہ مجھ کو

سو میں نے کہہ دیا " تو بھی غلط، تیرا قیافہ بھی

بہاول پور سے آتے ہوئے یہ دھیان میں کب تھا

کہ محرومی مٹا سکتا نہیں دار الخلافہ بھی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

گرفتہ پا کی گرفتار نے مدد کی ہے 

اٹھی جو بیل تو دیوار نے مدد کی ہے 

ہمارے اشک سنبھالے تمہاری پلکوں نے 

مہاجرین کی انصار نے مدد کی ہے 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ایسا بھی نہیں ہے کہ دہائی نہیں دیتا

میں شور مچاتا ہوں سنائی نہیں دیتا

دانستہ مجھ آوارہ سے ٹکرا کے یہ دنیا 

کہتی ہے کہ اندھے ہو؟ دکھائی نہیں دیتا؟

کیا اُس کو محبت میں گرفتار کریں ہم 

کنگن کو بھی جو اپنی کلائی نہیں دیتا 

۔۔۔۔۔۔۔۔۔۔۔۔۔۔۔۔۔۔۔۔۔

میں رائگانی بھی لکھوں تو رائگاں نہ سمجھ 

مری غزل کو مرا حلفیہ بیاں نہ سمجھ 

یہ زندگی کا سلیبس ہے، تجھ سے کیسے کہوں 

فلاں سوال سمجھ اور فلاں فلاں نہ سمجھ

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کچے پھلوں کے واسطے طوفان باندھ کر

بیٹھا ہوں اک درخت سے قرآن باندھ کر

فاقہ کشوں کو روکیے کاٹیں نہ اپنا ماس 

 روٹی بھی ساتھ لائے گا مہمان باندھ کر

آتے ہیں اس نگر میں سکوت کو ہجرتی 

جاتا ہوں جس جگہ سے میں سامان باندھ کر

دم گھٹ رہا تھا پھر بھی رکھا جس کا بھرم

میں نے کھلے دریچے پہ بہتان باندھ کر

۔۔۔۔۔۔۔۔۔۔۔۔۔۔۔۔۔۔۔۔۔۔۔

خرام دشت میں کرتا ہوں، رقص بیلے میں 

 گزر رہے ہیں شب و روز موج میلے میں 

تمہاری ہم نے ہی قیمت بڑھائی ہے ورنہ 

ہزار ملتے ہیں تم جیسے ایک دھیلے میں

گلی گلی میں صدائیں لگاتا پھرتا ہوں

 یہ اور بات ہے کہ کچھ بھی نہیں ہے تھیلے میں

سنا تو ہوگا مری ماں نے دفن ہوتے ہوئے 

 کہا تھا میں نے کہ ڈرنا نہیں اکیلے میں 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کتنے لوگوں کا یہاں وار کے خوں بیٹھا ہوں 

جیسے اٹھنا ہی نہیں تخت پہ یوں بیٹھا ہوں

شہر کے وسط میں اس چلہ کشی پر لعنت

 ایک بھی شخص نے پوچھا نہیں کیوں بیٹھا ہوں

 نیکیوں اور گناہوں کے ہیں پلڑے یکساں 

جنتی ہوں نہ ابھی دوزخی ہوں بیٹھا ہوں 

نقش گر! میری بھی ضد ہے کہ ترے چاک پہ میں 

جب تلک پہلے سے بہتر نہ بنوں، بیٹھا ہوں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

آخر اس شخص نے تھک ہار کے سرگوشی کی 

جو یہ کہتا تھا زباں ہوتی ہے خاموشی کی 

آخری جملہ کہا بوڑھے شجر نے کٹ کر 

انتہا ہو گئی احسان فراموشی کی 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مشکل ہے اپنی سوچ میں ہیجان لاؤں میں

کیسے ترے بدن کی طرف دھیان لاؤں میں

تو پہلا ہم رکاب ہے میرا نہ آخری

پھر بھی ہے تیرا حکم تو سامان لاؤں میں؟

انکار کر رہا ہے وہ میرے وجود سے

لازم ہے اس کے کفر پہ ایمان لاؤں میں

۔۔۔۔۔۔۔۔۔۔۔۔۔۔۔۔۔۔۔۔۔۔

سرسری میرا زخم جانچ اور بس 

اک ذرا سا چبھا ہے کانچ، اور بس

گرم جوشی سے مل سدا مجھ کو

تیز رکھ قربتوں کی آنچ اور بس

کس قدر کم ہیں آدمی کے حواس

ایک دو تین چار پانچ اور بس

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کیسے ٹالا ہے گھر آئے ہوئے فریادی کو

یار ہم مان گئے ہیں تری استادی کو

یاد آیا تری زلفوں میں الجھ کر اک دن

میں تو ترجیح دیا کرتا تھا آزادی کو

یہ غلام آپ کے ہاتھوں نہ مرے گا شاہا

زہر کا ٹیکہ لگا دیجیے شہزادی کو

آ گئے ہوں گے وہاں ہار پرونے والے

بیچ آیا ہوں گلابوں سے بھری وادی کو

میرے حاکم نے معیشت پہ توجہ دی ہے

یہی کافی ہے مرے شہر کی بربادی کو

تم سے جزوقتی تعلق ہے یہ دل بھرنے تک

دائمی عشق نہ کہنا کبھی میعادی کو

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

جس جگہ جا کے لگے شور شرابا اچھا

شہر میں اک بھی نہیں چائے کا ڈھابہ اچھا

مدحِ جاناں کے لیے ہجر ضروری ہے مجھے

میں جدا ہو کے ملاتا ہوں قلابہ اچھا

جنگ جنگل میں نہیں دشت میں لڑ لی جائے

پیشِ اشجار نہیں خون خرابہ اچھا

کان دھرتا نہ تھا گھر میں کوئی میری ضد پر

صرف ماں کہتی تھی " اچھا ارے بابا اچھا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

چلو ان واعظوں کو اپنی مجبوری بتاتے ہیں

کسی کے قرب کو جو دین سے دوری بتاتے ہیں

بہت سے کام دنیا کے ادھورے ہیں جنھیں ہم تم

رضاکارانہ کرتے ہیں نہ مزدوری بتاتے ہیں

مرے اجداد کو تعلیم ہے صبر و قناعت کی

سو ناکامی کو بھی قدرت کی منظوری بتاتے ہیں

اور اب اس غم میں آدھے رہ گئے ہیں باخبر ساتھی

کہ ہم ہر اجنبی کو بات کیوں پوری بتاتے ہیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

لے لے کوئی ہم سے سخن آرائی ہماری

ہوتی ہے بہت صرف توانائی ہماری

سب تکتے رہے راہ تماشائی ہماری

افسوس کہ باری ہی نہیں آئی ہماری

منظر کو اگر چاہیں تو ہم چیر کے رکھ دیں 

چاقو کی طرح تیز ہے بینائی ہماری 

تالاب ہیں ہم ہجر کی یخ بستہ رتوں کے

سب آئینگی چاٹ گئی کائی ہماری

بس ہونٹ ہلانے کی سزا دیجیے صاحب 

گویائی ہماری نہیں گویائی ہماری

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

میں کیا کروں کہ طبیعت بڑی جنونی ہے 

ملا ہوں تجھ سے مگر پھر بھی بے سکونی ہے 

ٹکور چاہیے مجھ کو تمھاری سانسوں کی

مرے بدن میں کوئی چوٹ اندرونی ہے

وصال رت کو تعلق کی بیڑیوں میں نہ ڈھونڈ

وہ شال ریشمی تھی اور یہ شال اونی ہے

یہاں کے لوگ پجاری ہیں چڑھتے سورج کے

یہاں درخت لگانا بھی بد شگونی ہے

تو ایسے غم سے بچا دامن۔سفید اپنا

یقین کر مرے اشکوں کا رنگ خونی ہے

یہ دیکھ کر ہی مرا حوصلہ بڑھا افضل

وہ آج خوش ہے، اکیلی ہے، راہ سونی ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

رہ رہ کے اجل تھوکتی تاخیر کے منہ پر

تم زہر بھی مَل دیتے اگر تیر کے منہ پر

اس درجہ سہولت بھی غلامی میں بہت ہے

روزن ہے ہر اک حلقہِ زنجیر کے منہ پر

شرمندہ ہیں سب نقشِ قدم چومنے والے

لعنت ہو پلٹتے ہوئے رہگیر کے منہ پر

جتنا ہوں طرف دار، سمجھ دار بھی اتنا

غالب کی ثنا کرتا نہیں میر کے منہ پر

دو ہونٹ بنا بھیجے ہیں کا غذ پہ کسی نے

کیا خوب طمانچہ ہے یہ تحریر کے منہ پر

پھر مجھ پہ ہو کیونکر مرے اعمال کا ذمہ

جب مہر لگا دی گئی تقدیر کے منہ پر

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ایک سے پڑتے ہیں دونوں مقبروں پر پھول بھی

جنت الفردوس میں قاتل بھی ہے مقتول بھی

دیکھ اے دنیا ! ہمیں ترتیب دینا چھوڑ دے

تو بگاڑے گی ہمارا روز کا معمول بھی

یہ جو طعنے دے رہی ہے برق رفتاری مجھے

وجد میں آ جاوں تو پائے نہ میری دھول بھی

اک سخن پر داد مل جاتی ہے اک پر لعن طعن

بات میں معقول بھی کرتا ہوں، نا معقول بھی

ان حسیں ہاتھوں نے لکھ کر جب مٹایا میرا نام 

میں یکا یک ہو گیا ہوں گم نام بھی مقبول بھی 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ہجر کے بیمار کو اس سے ہو کافی اور کیا 

آپ نے کہہ تو دیا اللّٰہ شافی، اور کیا 

بخشنے لائق نہ تھا ورنہ لکڑہارے کا جرم 

مانگ لی ہو گی پرندوں سے معافی اور کیا 

اب تمہارے نام کی سب لڑکیوں سے اُنس ہے 

یہ نہیں ہوتی تو ہوتی ہے تلافی اور کیا 

وہ سمجھتی ہے غزل اس پر کہوں گا اور میں 

سوچتا رہتا ہوں آئیں گے قوافی اور کیا 

مجھ سے دنیا خوار کو بھائے گی کیوں جنت کی سیر 

نوٹ لکھوں گا وہاں بھی اختلافی اور کیا 

پھر وہی جھوٹی تسلی پھر وہی سچا گمان 

پھر وہی وعدہ، وہی وعدہ خلافی اور کیا 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

آثارِ سفر کیوں رگ و پے سے نہیں جاتے 

ہم ایسے کہیں جاتے ہیں جیسے نہیں جاتے 

تصدیق کرو رب ہے بلاتا کہ موذن 

گھر اور کسی کا ہو تو ایسے نہیں جاتے 

میں شہر بدر ہونے کو تیار ہوں لوگو 

کیوں طیش میں آتے ہو کہ کیسے نہیں جاتے 

مٹی کی جگہ ہیں جو دل میں وہ پیارے 

ایسے تو چلے جاتے ہیں ویسے نہیں جاتے 

میں بانسری بن کر کئی ہونٹوں سے لگا ہوں 

لیکن ترے صدمے کسی لے سے نہیں جاتے